Der toåringar vert brukte som gislar og kasta i tortur-fengsel

Medan vi snur ryggen til, brukar juntaen i Myanmar born så små som to år som gislar i jakta på foreldre som er med i motstandskampen.

Og medan vi framleis snur ryggen til, blir gissel-borna mellom to og 17 år kasta i fengsel der det skjer systematisk tortur.

Dette blei avdekt av FN-etterforskarar i ein rapport i sommar. Det var altså ikkje Gaza der brutaliteten mot sivile over bakken og gislar i tunellar under jorda dagleg sjokkerer oss.

Dette var Myanmar. Men norske media brydde seg ikkje, utover nokre få notisar. Den norske regjeringa som har gitt uttrykk for sterk uro for brot på menneskerettar og humanitet i Myanmar, har ifølgje heimesida til Utanriksdepartementet ikkje meint noko om Myanmar sidan jordskjelvet i mars. Det er mange luftangrep og seksuelle overgrep sidan. Juntaen stogga verken bombetoktene eller valdtektene på grunn av jordskjelv.

Hadde det ikkje vore for at Telenor let juntaen få innsyn i telefontrafikken til fleire hundre motstandsfolk, ville det hos oss vore dørgande stille om Myanmar.

Brutaliteten eskalerer
Men grunn til å vera stille har vi ikkje. Den sjuande årsrapporten til «Den uavhengige etterforskingseininga for Myanmar» (IIMM) seier at «frekvensen og brutaliteten» i overgrepa eskalerer, over fire år etter kuppet i februar 2021.

Det skjer «systematisk tortur» i fengsla, fortel rapporten. Fangar vert utsette for slag, elektriske støyt eller kveling. Neglar vert dregne ut med tang. Valdtekter og gruppevaldtekter er dokumenterte.

Eg måtte stålsetja meg for å lesa om «innføring av gjenstandar i anal- og genitalopningar, seksuelt slaveri, brenning av intime kroppsdelar med sigarettar eller brennande gjenstandar, seksualisert berøring eller tvungen heil eller delvis nakenheit....».

Kvifor er det så stille blant politikarar, kyrkjefolk og journalistar?

Drep sivile. Brenner kyrkjer
Mange unge som vart møtte med brutal makt då dei demonstrerte mot kuppet i 2021, valde å ta til våpen. Dei gjekk inn i motstandsgrupper side om side med etablerte militsar i dei ulike delstatane langs Myanmars yttergrenser. Der har etniske (og religiøse) minoritetar lenge kjempa mot juntaen som har base i det buddhistiske fleirtalet blant burmanarane sentralt i landet. Rapporten byggjer opp under tidlegare dokumentert brenning av katedralar i Kayah-staten og kyrkjer i Chin-staten.

Etterforskarane har sendt meir enn to dusin førespurnader til militæret. Dei har ikkje fått svar.

Vil utlysa val
Juntaen varsla nyleg at dei vil halda val 28. desember – eit illegitimt grep for å sikra makta som dei kuppa etter valet som Aung San Suu Kyi vann i november året før.

Medan juntaen førebur «valet», held luftangrepa også mot sivile fram. Den 17. og 19. august vart minst 26 drepne i ein landsby i Kayin-staten. Sjukehus, heimar og ein barnehage vart treft, melder Chin Human Rights Organization (CHRO) som kallar dette krigsbrotsverk.

Støtta av Kina og Russland
Generalane er støtta av ekstremistane blant buddhistiske munkar som vil at juntaen bryt ned motstand hos etniske grupper med muslimsk eller kristen overvekt. Utanfrå er juntaen støtta av Kina og Russland. General Min Aung Hlaing møtte både Vladimir Putin og Xi Jinping i Moskva i mai då dei feira 80-års dagen for slutten på andre verdskrigen.

Xi Jinping sa då at Kina og Myanmar står saman i «tjukt og tynt». Både Xi Jinping og juntaen i Myanmar er brutale mot etniske og religiøse grupper dei vil ha kontroll over.

Det finst helvete på jord også i Myanmar. Men altfor mange av oss bryr seg ikkje.

FØRST PUBLISERT I VÅRT LAND 26.8.2025